पिंकीऐवजी रितूला दिली संधी
वृत्तसंस्था, नवी दिल्ली
जागतिक अजिंक्यपद कुस्ती स्पर्धेसाठी आयोजित करण्यात आलेल्या चाचणीत न खेळण्याचा निर्णय कुस्तीगीर पिंकीने घेतला असून ५३ किलो वजनी गटातून खेळण्याची संधी रितू फोगटला मिळाली आहे. पिंकीने हा निर्णय घेऊन भारतीय कुस्ती महासंघावर एकप्रकारे नाराजी प्रकट केली आहे.
आशियाई क्रीडा स्पर्धेत पिंकीला अपेक्षित यश मिळाले नाही पण जकार्ताच्या आशियाई क्रीडा स्पर्धेआधी यासर दोगु स्पर्धेत तिने सुवर्णपदक जिंकले होते. लखनौ येथे झालेल्या चाचणीतून ५३ किलो वजनी गटात तिचा आशियाई क्रीडा स्पर्धा आणि जागतिक स्पर्धेसाठी प्रवेश निश्चित मानला जात होता. पण कुस्ती महासंघाने ५० किलो गटात खेळणाऱ्या रितूला ५३ किलो वजनी गटात खेळण्याची संधी देण्याचे ठरविले कारण आशियाई स्पर्धेच्या चाचणीसाठी विमानाचा घोळ झाल्यामुळे रितू पोहोचू शकली नव्हती.
पिंकी याबाबत नाराजी व्यक्त करताना म्हणाली की, लखनौ येथे झालेल्या चाचणीनंतर मी जागतिक स्पर्धेसाठी पात्र ठरले होते. त्यामुळे मी आता कोणतीही चाचणी देऊ इच्छित नाही. रितू अचानक ५३ किलो वजनी गटात कुठून आली ? त्यामुळेच मी चाचणीत सहभागी होण्यास नकार दिला.
यासंदर्भात कुस्ती महासंघाचे सहसचिव विनोद तोमर म्हणाले की, देशाच्या हितासाठी आम्ही नवी चाचणी घेण्याचा निर्णय घेतला. यात कोणत्याही खेळाडूला झुकते माप देण्याचा आमचा प्रयत्न नाही. जागतिक स्पर्धेत भारतीय संघाचे हितच आम्ही डोळ्यासमोर ठेवले आहे. आशियाई क्रीडा स्पर्धेसाठी घेतलेल्या चाचणीला विमानाला वेळ झाल्यामुळे रितू उपस्थित राहू शकली नव्हती. शिवाय, आशियाई स्पर्धेत पिंकीची कामगिरी अपेक्षेप्रमाणे झाली नाही.
तोमर म्हणाले की, आम्ही रितूला जागतिक स्पर्धेसाठी थेट प्रवेश दिलाच नव्हता. आम्ही तिला विचारले की, तुला चाचणी द्यायची आहे का, तेव्हा तिने होकार दिला. आम्ही पिंकीला ही गोष्ट सांगितली. पण तिने चाचणीला येण्यास नकार दिला. त्यामुळे आम्ही ५३ किलोसाठी रितूचे नाव पाठवले.
रितूला ५० किलो वजनी गटाच्या चाचणीसाठी का विचारले नाही, यावर तोमर म्हणाले की, त्या वजनी गटात विनेश फोगट खेळते आहे आणि आशियाई स्पर्धेतील सुवर्णपदकामुळे आम्ही तिच्या सरावात खंड आणू इच्छित नाही.
राष्ट्रीय प्रशिक्षक कुलदीप मलिक म्हणाले की, आम्ही खालच्या वजनी गटातील कुस्तीगीराशी (रितू ५० किलो) खेळवून पिंकीची क्षमता तपासणार होतो. जर ती रितूशी खेळू शकत नसेल तर खालच्या वजनी गटात आणखी कोण आहे ? जागतिक स्पर्धेत ती वरच्या वजनी गटातील खेळाडूंशी कशी काय स्पर्धा करू शकते ?
साक्षी मलिकही या चाचणीसाठी आली होती पण ६२ किलो वजनी गटात तिची प्रतिस्पर्धी सरिता मोर हिने गुडघेदुखीच्या कारणास्तव माघार घेतली.
जागतिक स्पर्धा २० ते २८ ऑक्टोबर या कालावधीत बुडापेस्ट येथे होत आहे.