सिंगापूरमधील एज ग्रुप जलतरण
म.टा. विशेष प्रतिनिधी, मुंबई
पुढील महिन्यात होत असलेल्या राष्ट्रकुल स्पर्धेसाठी तयारी करत असलेला महाराष्ट्राचा आघाडीचा जलतरणपटू वीरधवल खाडे याने स्पर्धात्मक जलतरणात पुन्हा एकदा यशस्वी सूर मारला असून सिंगापूर येथे सुरू असलेल्या नॅशनल एज ग्रुप स्पर्धेत त्याने ५० मीटर बटरफ्लाय प्रकारात रौप्यपदक जिंकले. गोल्ड कोस्ट येथे होणाऱ्या राष्ट्रकुल स्पर्धेसाठी सज्ज असलेल्या वीरधवलने २४.७३ सेकंद अशी वेळ दिली. ऑलिम्पिकपटू आणि अर्जुन पुरस्काराने सन्मानित वीरधवलने या कामगिरीनंतर सांगितले की, राष्ट्रीय जलतरण स्पर्धेपेक्षाही आता मी अधिक तंदुरुस्त आहे आणि माझ्या कामगिरीचा आलेख आणखी उंचावत जाईल. ही एक योग्य सुरुवात झाली असे वाटते.