ऑस्ट्रेलियन ओपन टेनिस
मेलबर्नः ऑस्ट्रेलियन ओपन टेनिस स्पर्धेत एकेरीचे विक्रमी सातवे जेतेपद पटकावण्यास सज्ज झालेल्या नोव्हाक जोकोविचला या स्पर्धेत तुलनेत सोपी सलामी असेल. त्याला पहिल्या फेरीत मुकाबला करायचा आहे तो प्राथमिक फेरीचा अडथळा पार करून आलेल्या टेनिसपटूशी. गेल्यावर्षी जोकोविचने जबरदस्त पुनरागमन करत अव्वल क्रमांक पटकावला आहे. दुखापती, हरवलेला सूर यामुळे त्याचे जागतिक रँकिंगमध्ये वीसच्या बाहेर गेले होते. यावर मात करून जोकोविच पुन्हा अव्वल झाला. दुसऱ्या फेरीत त्याचा मुकाबला फ्रान्सच्या जो विलफ्रेड सोंगाशी होऊ शकतो.
गतविजेत्या रॉजर फेडररला तिसरे सीडिंग आहे. तोदेखील या स्पर्धेच्या सातव्या जेतेपदासाठी प्रयत्न करतो आहे. त्याची सलामी होईल ती जागतिक रँकिंगमध्ये ९९वर असलेल्या डेनिस इस्तोमिनशी. तर उपांत्य फेरीत फेडररचा मुकाबला रफाएल नदालशी होऊ शकतो. 'जोकोविच सातत्याने मला आव्हान देत आला आहे. तो फॉर्मात होता, त्याला नमवणे कठीण होते, तेव्हापासून मी जोकोविचला टक्कर देतो आहे. त्याच्याविरुद्ध खेळणे मला आवडते; फक्त आपण नाराज, निराश व्हायचे नाही. वैतागायचे नाही... संयमाने खेळायचे', असे डावपेच फेडररने सांगितले. दुसऱ्या सीडेड नदालचा मुकाबला होईल तो ऑस्ट्रेलियाच्या जेम्स डकवर्थशी. चौथा सीडेड अॅलेकझँडर झ्वेरेव्ह स्लोव्हानियाच्या अॅलिझ बेडेनीचा मुकाबला करणार आहे. तर गतवेळचा उपविजेता मरिन चिलीचपुढे सलामीलाच उभा ठाकला आहे तो ऑस्ट्रेलियाचा चाणाक्ष टेनिसपटू बेनार्ड टॉमिच. याशिवाय निक किरिगिओस विरुद्ध मिलोस रावनिच ही सलामीही चुरशीची होईल.
सेरेनाची खडतर वाटचाल
यंदाच्या स्पर्धेत १६वे सीडिंग लाभलेल्या माजी विजेत्या सेरेना विल्यम्सची जेतेपदापर्यंतची वाटचाल खडतर असेल. आठवे ऑस्ट्रेलियन जेतेपद आणि एकेरीतील सर्वाधिक ग्रँडस्लॅम जेतेपदे पटकावण्याचा मार्गरेट कोर्टचा विक्रम मागे टाकण्यासाठी सेरेनाला एका जेतेपदाची आवश्यकता आहे. स्पर्धेच्या सुरुवातीच्या फेऱ्यांमध्येच तिला जागतिक रँकिंगमध्ये अव्वल असेल्या सिमोना हालेपचा सामना करावा लागू शकतो.