मैदानात पुन्हा घुसली महिला; Live सामना थांबवला, व्हिडिओमध्ये पाहा घडलं तरी काय

पॅरिस : काही दिवसांपूर्वी ऑस्ट्रेलियात झालेल्या एका रग्बी सामन्यात एका महिलेने असा काही प्रकार केला ज्यावरून जगभर चर्चा सुरू झाली होती. यावेळी रग्बी सामन्यात एक महिला चक्क टॉपलेस होऊन मैदानात घुसली. यामुळे सामना काही काळासाठी थांबवावा लागला. आता फ्रेंच ओपन खुली टेनिस स्पर्धा सुरु असताना एक महिला अशीच लाइव्ह सामन्यात मैदानात घुसल्याचे पाहायला मिळाले. या घटनेचे फोटो आणि व्हिडिओ सोशल मीडियावर चांगलेच व्हायरल होत आहेत.
नेमकं घडलं तरी काय, पाहा...
शुक्रवारी या स्पर्धेच्या एका उपांत्य फेरीतून राफेल नदाल हा अंतिम फेरीत पोहोचला. पण क्रोएशियाचा मारिन सिलिच आणि नॉर्वेचा कॅस्पर रुड यांच्यातील सामना चांगलाच रंगत आलेला असताना ही महिला कोर्टमध्ये घुसली. पहिल्यांदा तर ही महिला नेमकी कोर्टमध्ये कशी आणि कशासाठी आली हे समजत नव्हते. पण कोर्टमध्ये घुसल्यावर ही महिला थेट नेट्सजवळ गेली आणि त्यानंतर आपल्या गळ्यातील चैनीने आपली मान नेट्सला अडकवली. ही महिला असं नेमकं काय करते आहे, हे कोणाच्याच गावी नव्हते. पण ही महिला जेव्हा नेट्सजजवळ जाऊन बसली तेव्हा एकामागून एक गोष्ट उलगडायला लागल्या. या महिलेने एक टी शर्ट परीधान केले होते. या टी शर्टवर आपल्याकडे फक्त १०२८ दिवस शिल्लक आहेत, असे लिहिलेले होते. हे वाचल्यावर सर्वांच्याच मनातील गूढ आणखी वाढत गेले. त्यानंतर काही वेळातच सुरक्षा रक्षकांनी मैदानात धाव घेतली. सुरुवातीला त्या महिलेने नेट्सला अडकवलेली मान सोडवण्यात आली आणि त्यानंतर तिला उचलून कोर्टबाहेर नेण्यात आले. त्यानंतर या महिलेबाबतची माहिती मिळाली. ही महिला पर्यावरण वाचवण्यासाठी प्रयत्नशील होती. पर्यावरणाची एवढी हानी झाली आहे की, येत्या १०२८ दिवसांमध्ये बरेच काही बदलणार आहे आणि त्यामुळे माणसांना मोकळा श्वास घेणे कठीण होऊ शकते. पर्यावरणाची होणारी हानी रोखावी, हे सांगण्याचा प्रयत्न या महिलेने केला होता आणि यासाठी तिने या स्पर्धेच्या सामन्याचा आधार घेतल्याचे पाहायला मिळाले.