करोनामुळे भारतीय टेनिसपटूंची निराशा
वृत्तसंस्था, नवी दिल्ली
करोना विषाणूच्या संसर्गामुळे करण्यात आलेल्या लॉकडाउनमुळे अनेकांना आर्थिक तोटा सहन करावा लागत आहे. यातून भारतीय खेळही सुटलेले नाहीत. टेनिस या खेळालाही असाच आर्थिक फटका बसत आहे. मात्र, पैशांसोबतच वेळही वाया जात असल्याने भारताचे आजी-माजी टेनिसपटू निराश झाले आहेत.
प्रो-टूर रद्द झाल्याने पूरव राजाला ५० हजार डॉलरला मुकावे लागणार आहे. आपल्याला नेमका किती आर्थिक फटका बसला हे प्रज्ञेश गुणेश्वरन, जीवन नेदुन्चेळीयन, दिविज शरण यांना नेमके सांगता आले नाही. मात्र, ते सातत्याने ग्रँड स्लॅमच्या मुख्य फेरीत प्रवेश करीत आहेत. त्यामुळे त्यांनाही मोठा भुर्दंड सहन करावा लागणार आहे. हे न भरून येणारे नुकसान आहे. भारताचा माजी टेनिसपटू महेश भूपती म्हणाला, की खेळाडू, प्रशिक्षक, मार्कर यांच्यासह बॉल बॉइज यांनाही मोठा फटका बसला आहे. खरे तर लॉन टेनिस असोसिएशन आणि फ्रेंच टेनिस फेडरेशन यांनी पॅकेजही घोषणा केली आहे. त्यांच्याकडे तेवढा पैसा आहे. या सर्वांचा विचार व्हायलाच हवा.
अॅकॅडमीवाल्यांचे दु:ख
भारतीय डेव्हिस कप संघाचे प्रशिक्षक झीशान अली, फेड कप कर्णधार विशाल उप्पल आणि दुसरे भारतीय प्रशिक्षक आशुतोष सिंग यांचीदेखील हीच भावना आहे. यातील अनेक जणांच्या अॅकॅडमी आहेत. अॅकॅडमी बंद असल्या तरी त्यांना प्रशिक्षकांचे मानधन द्यावेच लागते आहे. भारतात सध्या ३८२७ प्रशिक्षित प्रशिक्षक आहेत. त्याचबरोबर १० हजार सहायक प्रशिक्षक आहेत. अखिल भारतीय टेनिस संघटनेकडे नोंद नसलेल्या प्रशिक्षकांची संख्या तर हजारोंमध्ये आहे. त्याचबरोबर संघटनेशी निगडीत देशात किमान २ हजार अॅकॅडमी आहेत. या सर्वांचे अर्थचक्र थांबले आहे. आशुतोष सिंग म्हणाले, की तुमची खरी किंमत संकटातच कळते. आम्ही टेनिससाठी राबत आहोत. या खेळाशी आम्ही खूप वर्षांपासून जुळलो आहोत. लॉकडाउनमुळे निश्चितच मोठा फटका सगळ्यांना बसणार आहे. मात्र, गेल्या अनेक वर्षांपासून जे तुमच्या अॅकॅडमीशी जोडले गेले आहेत, त्यांना या संकटाच्या काळात वाऱ्यावर सोडून कसे चालेल. आशुतोष यांच्या अॅकॅडमीत पाच प्रशिक्षक आहेत. त्यांनी सगळ्यांना पूर्ण मानधन देण्याचे आश्वासन दिले आहे.
झीशान अली यांची बेंगळुरूत अॅकॅडमी आहे. त्यांच्या अॅकॅडमीत १२ जण आहेत. ते म्हणाले, की आमची काही कंपनी नाही की आम्ही घरून काम करून पैसे कमवू शकू. आम्ही सततच्या दौऱ्यावर असणारे प्रशिक्षक आहोत. मी अॅकॅडमीतील प्रशिक्षकांना परत जाण्याचा सल्ला दिला आहे. त्यांना त्यांचे मानधन मिळेल. आशा आहे, की पुढेही त्यांचे मानधन देत राहू. पण, हे नुकसान अनिश्चित काळासाठी आम्हाला परडवणार आहे का?
'जीएसटी आकारू नका'
उप्पल यांच्या अॅकॅडमीत १४ जण काम करतात. ते म्हणाले, की या अॅकॅडमीतील सगळ्यांच्या मानधनावर महिन्याला साडेचार लाख रुपये खर्च होतात. सध्या ते या खर्चाचा भार उचलत आहेत. पण, लॉकडाउन उठल्यानंतरही लगेचच पालक आपल्या मुलांना अॅकॅडमीत पाठवणार नाहीत. अशा स्थितीत सरकारने काही ठोस पावले उचलण्याची गरज आहे. सरकारने खेळावर जीसीएटी आकारू नये. खेळाचा शिक्षणात समावेश केला, तर अॅकॅडमीवरील १८ टक्के जीसीएसटी आम्हाला भरावा लागणार नाही.
...............
दीर्घकाळ लॉकडाउनचा निश्चित फटका सर्व टेनिसपटूंना बसणार आहे. क्रीडापटूंची कारकीर्द मर्यादित असते. त्यातच या ब्रेकमुळे महत्त्वाची वेळ निघून जाईल. सद्यस्थितीत अनेक राष्ट्रीय संघटना आपापल्या खेळाडूंच्या मदतीसाठी पुढे येत आहेत. भारतीय टेनिस संघटना खेळाडूंच्या मदतीसाठी नियोजन करत असल्याचे सांगत आहे. मात्र, आम्हाला त्यांच्याकडून यापेक्षा अधिकची अपेक्षा आहे.
- दिविज शरण
.....