इटालियन ओपनच्या अंतिम फेरीत धडक
वृत्तसंस्था, रोम
रफाएल नदालने इटालियन ओपन (रोम मास्टर्स) टेनिस स्पर्धेच्या फायनलमध्ये धडक मारली आहे. शनिवारी पार पडलेल्या उपांत्य लढतीत त्याने नोव्हाक जोकोविचवर ७-६ (७-४), ६-३ अशी मात करुन जेतेपदाच्या सामन्यात प्रवेश केला. तिथे त्याचा सामना होईल तो, गतविजेता अॅलेक्झँडर झ्वेरेव्ह किंवा मरिन चिलीच यांच्यापैकी एकाशी. नदालचा हा जोकोविचविरुद्धचा ५१वा सामना ठरला.
'सामना आव्हानात्मक होता. अर्थात जोकोविचविरुद्ध झुंजणे नेहमीच कठीण आणि आव्हानात्मकच असते. तो या लढतीतही कट्टर अन् कडव्या प्रतिस्पर्ध्यासारखा लढला. तुम्ही थोडे जरी चुकलात, तरी त्याचा फायदा उचलत तुम्हाला मागे टाकण्यात जोकोविच क्षणाचाही विलंब करत नाही. त्याच्याविरुद्धची साधीशी चूकही तुम्हाला खूप महागात पडू शकते. मला जोकोविचला निरुत्तर करण्यासाठी आक्रमक फोरहँडचे अस्त्र वापरायचे होते. ते जमले आणि मग मी सामन्यावर नियंत्रण मिळवले', असे स्पेनचा रफाएल नदाल म्हणाला.
अंतिम फेरीबाबत नदालने सांगितले की, 'रविवारी रंगणाऱ्या फायनलसाठी मला पूर्ण तयारीनिशी सज्ज व्हायचे आहे. जोकोविचवरील विजयामुळे माझा आत्मविश्वास दुणावला आहे. गेल्या आठवड्यात माद्रिदमध्ये पराभव झाल्यानंतर या रोम स्पर्धेने मला सकारात्मक दृष्टिकोन दिला आहे. या स्पर्धेच्या फायनलमध्ये प्रवेश केल्याचा आनंदही मोठाच आहे'.