उपांत्य फेरीत सिसिपासवर सरळ सेटमध्ये मात
रोमः स्पेनच्या रफाएल नदालने शनिवारी कारकिर्दीत ५०व्यांदा एटीपी मास्टर्स हजार गुणांच्या टेनिस स्पर्धेच्या फायनलमध्ये धडक मारली आहे. या निमित्ताने त्याने प्रथमच २०१९च्या टेनिस मोसमातील पहिल्याच क्ले कोर्ट फायनलमध्ये प्रवेश केला आहे. उपांत्य फेरीत त्याने ग्रीसच्या स्टीफानोस सिसिपासवर ६-३, ६-४ अशा मात करत रोम मास्टर्स टेनिस स्पर्धेच्या फायनलमध्ये धडक मारली आहे. गेल्याच आठवड्यात माद्रिद स्पर्धेच्या उपांत्य फेरीत नदालला हरवून सिसिपास हा क्ले कोर्टवर नदालला नमवणारा सर्वात तरुण खेळाडू ठरला होता. मात्र यावेळी नदालने सिसिपासला रोखले.
नदालने अगदी पहिल्या गेमपासून सिसिपास डोईजड होणार नाही याची खबरदारी घेतली. यामुळेच त्याने ही लढत एक तास ४३ मिनिटांत जिंकली. नदालने आता सिसिपासविरुद्धच्या पाचपैकी चार लढती जिंकल्या आहेत. ३२ वर्षांच्या नदालने ऑस्ट्रेलियन ओपननंतर प्रथमच एखाद्या टेनिस स्पर्धेच्या फायनलमध्ये प्रवेश केला आहे. यंदा नदालने २१ लढती जिंकल्या असून पाच झुंजी गमावल्या आहेत. फायनलमध्ये नदालची लढत होईल ती नोव्हाक जोकोविच विरुद्ध दियागो श्वार्टमन यांच्यातील विजेत्याशी.
सिसिपासचा बॅकहँड ताकदीचा आहे हे हरून नदालने सुरुवातीपासून त्याच्या या 'अस्त्रावर' तोडगा शोधला. सिसिपास बेसलाइनच्या पुढे येणार नाही, त्याचा बचाव सैलच राहील याची खबरदारी नदालने पावलोपावली घेतली.
कोन्ता फायनलमध्ये
रोमः ब्रिटनच्या जॉना कोन्ताने रोम स्पर्धेत महिलांच्या फायनलमध्ये धडक मारली आहे. सेटची पिछाडी भरून काढत तिने किकी बर्टन्सचे आव्हान ५-७, ७-५, ६-२ असे परतवून लावले. ही लढत तब्बल तीन तास रंगली होती.