ऑलिंपिक कोटा
संजीवकडून निश्चित
वृत्तसंस्था, रिओ दी जानेरो
भारताच्या संजीव राजपूतने वर्ल्ड कप नेमबाजी स्पर्धेतील पुरुषांच्या ५० मी. रायफल थ्री पोझिशनमध्ये रौप्यपदक मिळविले. यासह संजीवने '२०२० टोकियो ऑलिंपिक'चे तिकीटही बुक केले. २८ वर्षीय संजीवने ४६२.० गुणांसह रौप्य मिळविले, तर क्रोएशियाच्या पीटर गोर्साने ४६२.२ गुणांसह सुवर्ण पटकावले. चीनच्या झँग चँगहाँगला ब्राँझपदकावर समाधान मानावे लागले. संजीवचे सुवर्ण थोडक्यात हुकले. ४४व्या शॉटअखेर संजीव ४५३.२ गुणांसह अव्वल, तर गोर्सा ४५२.२ गुणांसह दुसऱ्या क्रमांकावर होता. अखेरच्या शॉटमध्ये सरस कामगिरी करत गोर्साने सुवर्णपदकावर नाव कोरले. यापूर्वी, २०१६मध्येही वर्ल्ड कपमध्ये त्याला रौप्यपदकावर समाधान मानावे लागले होते. यापूर्वी, अंजम मुदगिल, अपूर्वी चंडेला, सौरभ चौधरी, अभिषेक वर्मा, दिव्यांशसिंग पन्वर, राही सरनोबत आणि अनू बाकर या नेमबाजांनी ऑलिंपिक कोटा निश्चित केला आहे. दरम्यान, महिलांच्या १० मी. एअर रायफलमध्ये २० वर्षीय एलावेनिल वलारिवनने सुवर्णयश मिळविले. वर्ल्ड कपमध्ये १० मी. एअर रायफल प्रकारात सुवर्णपदक जिंकणारी एलावेनिल ही भारताची तिसरी महिला नेमबाज ठरली. यापूर्वी, अंजली भागवत आणि अपूर्वी चंडेला यांनी हा पराक्रम केला आहे.