डॉमिनिकची आगेकूच
दुसऱ्या मानांकित झ्वेरेववर मात करून उपांत्य फेरीत प्रवेश
फ्रेंच ओपन
वृत्तसंस्था, पॅरिस
ऑस्ट्रियाच्या डॉमिनिक थिमने फ्रेंच ओपन टेनिस स्पर्धेत अलेक्झांडर झ्वेरेवला पराभूत करून उपांत्य फेरीत प्रवेश केला. या विजयासह डॉमिनिकने सलग तिसऱ्या वर्षी फ्रेंच ओपनची उपांत्य फेरी गाठली. दुसरीकडे पायाच्या दुखापतीमुळे झ्वेरेवला पूर्ण क्षमतेने खेळ करता आला नाही.
पुरुष एकेरीच्या उपांत्यपूर्व फेरीत सातव्या मानांकित डॉमिनिकने दुसऱ्या मानांकित झ्वेरेववर ६-४, ६-२, ६-१ अशी सरळ सेटमध्ये मात केली. जागतिक क्रमवारीत डॉमिनिक आठव्या, तर झ्वेरेव तिसऱ्या स्थानावर आहे. यापूर्वी हे दोघे सहा वेळा आमनेसामने आले होते. त्यातील चार लढती डॉमिनिकने जिंकल्या होत्या, तर दोन लढती झ्वेरेवने जिंकल्या होत्या. या वेळी या दोन मित्रांमध्ये कोण सरस ठरणार, याबाबत उत्सुकता होती. डॉमिनिक हा क्ले कोर्ट स्पेशालिस्ट म्हणून ओळखला जातो. त्याच्या हा लौकिक त्याने खरा ठरविला. बेसलाइनवरून सुरेख खेळ करून त्याने झ्वेरेवला संधीच दिली नाही. झ्वेरेव प्रथमच ग्रँडस्लॅम टेनिस स्पर्धेच्या उपांत्यपूर्व फेरीत दाखल झाला होता. मात्र, त्याला डॉमिनिकच्या तोडीस तोड खेळ करण्यात यश आले नाही. याला कारणही तसेच होते. दुखापतीमुळे त्याच्या हालचालींवर मर्यादा येत होत्या. गेल्या तीन सामन्यांत पाच सेटपर्यंत लढावे लागल्याचा फटका झ्वेरेव्हला दुखापतीच्या स्वरुपात बसला होता.
पहिल्या सेटमध्ये डॉमिनिकने झ्वेरेवची सर्व्हिस ब्रेक करून ३-३ अशी बरोबरी साधली. यानंतर डॉमिनिकने मागे वळून पाहिलेच नाही. त्याने एक तास पन्नास मिनिटांत ही लढत जिंकली. २१ वर्षीय झ्वेरेवला दुसऱ्या सेटमध्ये डाव्या मांडिला वेदना जाणवू लागल्या. याचा परिणाम त्याच्या खेळावर झाला. त्याने वाइड चेंडू परतवून लावण्याचा फारसा प्रयत्नच केला नाही. ब्रेकदरम्यान त्याने उपचारही घेतले. पण, त्याचा फारसा फायदा झाला नाही. तिसऱ्या सेटमध्ये तर अवघ्या १५ मिनिटांत डॉमिनिकने ४-० अशी आघाडी घेतली होती. यानंतर झ्वेरेवने एक गेम जिंकला खरा; पण तो आपला पराभव काही टाळू शकला नाही. डॉमिनिकची आता पुढील फेरीत नोव्हाक जोकोविच आणि मार्को यांच्यातील विजेत्याशी लढत होईल. 'झ्वेरेवसाठी हा पराभव खूप जड गेला असेल. मला आशा आहे की यापुढे ग्रँडस्लॅम स्पर्धांमध्ये आम्ही असेच महत्त्वाच्या फेऱ्यांमध्ये आमने-सामने येऊ अन् तेव्हा आम्ही दोघेही शंभर टक्के फिट असू,' असे डॉमिनिक म्हणाला.
किज-स्टिफन्स आमनेसामने
महिला एकेरीच्या उपांत्य फेरीत अमेरिकेच्या मॅडिसन किज आणि स्लोअन स्टिफन्स आमनेसामने येणार आहेत. उपांत्यपूर्व फेरीत तेराव्या मानांकित किजने पुतिनत्सेवावर ७-६ (७-५), ६-४ असा, तर दहाव्या मानांकित स्टिफन्सने चौदाव्या मानांकित डारिया कासातकिनावर ६-३, ६-१ अशी मात केली.