डेव्हिस कप
वृत्तसंस्था, नवी दिल्ली
पायाच्या दुखापतीमुळे युवा खेळाडू शशीकुमार मुकुंद याने पाकिस्तानविरुद्धच्या डेव्हिस कप टेनिस स्पर्धेतील लढतीतून शनिवारी माघार घेतली. पोर्तुगालमधील एका स्पर्धेत खेळत असताना त्याला दुखापत झाली. शशीकुमार मुकुंदचा डेव्हिस कपसाठीच्या भारतीय संघात राखीव म्हणून समावेश करण्यात आला होता.
डेव्हिस कप संघाचे प्रशिक्षक झीशन अली म्हणाले, 'दुर्दैवाने शशी आमच्यासोबत नसेल. पूरव राजासोबत खेळत असताना त्याला दुखापत झाली आहे. याबाबत त्याने संघटनेला कळविले आहे.' या आधी खांद्याच्या दुखापतीमुळे रोहन बोपण्णाने माघार घेतली होती. दुखापत झाली असल्याने संघासोबत जाण्यात काहीही अर्थ नाही, असे शशीकुमार मुकुंदने सांगितले. नूर सुल्तान येथे होणाऱ्या या लढतीसाठी एन. श्रीराम बालाजीचा भारतीय संघात समावेश करण्याची प्रशिक्षक झीशन यांची इच्छा आहे. मात्र, एवढ्या कमी वेळात व्हिसा मिळणे अवघड आहे. सर्व खेळाडूंना आपले व्हिसा नूर-सुल्तान विमानतळावर पोहोचल्यावरच मिळणार आहेत. बालाजीचा आठ सदस्यीय भारतीय संघात समावेश करण्यात आलेला नाही. मात्र, तो गुरुवारपासून भारतीय संघासोबतच सराव करीत आहे. न खेळणारा कर्णधार रोहित राजपाल यानेही शशीकुमार मुकुंदच्या दुखापतीबाबत निराशा व्यक्त केली. सध्या राजपाल हे दुहेरीची जोडी जमविण्याची तयारी करीत आहेत. लिअँडर पेस आणि जीवन नेदुन्चेळीयन हे एकत्र खेळण्याची शक्यता आहे. सरावात साकेत मायनेनी-बालाजी आणि रामकुमार रामनाथन- सिद्धार्थ रावत अशा जोड्या करण्यात आल्या होत्या.