म. टा. प्रतिनिधी, औरंगाबाद
एन्ड्युरन्स एमएसएलटीए मराठवाडा टेनिस सेंटरतर्फे आयोजित दहा वर्षांखालील राज्यस्तरीय मानांकन टेनिस स्पर्धेत औरंगाबादच्या शिवराज जाधव, वृंदिका राजपूत यांच्यासह ओम वर्मा (पुणे), आयुष पुजारी (ठाणे), सार्थक गायकवाड (कोल्हापूर), अरमानी नलावडे (कोल्हापूर), प्रिशा शिंदे (पुणे), पार्थसारथी मुंडे (सोलापूर) या खेळाडूंनी आपापल्या गटात उपांत्य फेरी गाठली आहे.
विभागीय क्रीडा संकुलातील एन्ड्युरन्स टेनिस सेंटरमध्ये या स्पर्धेला शनिवारी प्रारंभ झाला. दहा वर्षांखालील मुला-मुलींच्या राज्यस्तरीय मानांकन टेनिस स्पर्धेत पन्नास टेनिसपटूंनी सहभाग घेतला आहे. मुलांच्या गटात उपांत्य फेरीत औरंगाबादच्या शिवराज जाधव व ओम वर्मा (पुणे) यांच्यात लढत होणार आहे. दुसरी उपांत्य लढत आयुष पुजारी (ठाणे) व सार्थक गायकवाड (कोल्हापूर) यांच्यात होईल. मुलींच्या गटात अरमानी नलावडे (कोल्हापूर) व प्रिशा शिंदे (पुणे) यांच्यात तर वृंदिका राजपूत (औरंगाबाद) व पार्थसारथी मुंडे (सोलापूर) यांच्यात उपांत्य लढती होणार आहेत.
निकाल : उपांत्यपूर्व फेरी मुले : शिवराज जाधव वि. वि. शौर्य झवर (६-०), ओम वर्मा वि. वि. शौनक सुवर्णा (६-१), आयुष पुजारी वि. वि. पार्थ कुलकर्णी (६-०), सार्थक गायकवाड वि. वि. अभ्यंग फडणीस (६-१). मुलींचा गट : अरमानी नलावडे वि. वि. अनुष्का (६-४), प्रिशा शिंदे वि. वि. मृणाल शेळके (६-२), वृंदिका राजपूत वि. वि. महेक कपूर (६-५), पार्थसारथी मुंडे वि. वि. संयुक्ता पगारे (६-०).