ठाणे हत्याकांड गूढच राहणार?

पोलिसांना ठोस निष्कर्षाप्रत पोहोचणे तूर्त अवघड

म. टा. विशेष प्रतिनिधी, ठाणे

आपल्याच कुटुंबातील १४ जणांची हत्या करण्याइतके क्रौर्य हस्नेलकडे आले कुठून? याबाबत अनेक आघाड्यांवर तपास करून कारणमीमांसा शोधण्याचे प्रयत्न सुरू असले, तरी अनेकपैकी एका कारणामुळेच त्याने हे हत्याकांड घडविले, असा ठोस निष्कर्ष काढणे तूर्त तरी अवघड दिसत आहे. त्यामुळे या हत्याकांडामागचे गूढ उकलेल, अशी शक्यताही धूसरच असल्याची प्रतिक्रिया वरिष्ठ पोलिस अधिकाऱ्यांकडून व्यक्त होत आहे.

हस्नेल वरेकर या माथेफिरू तरुणाने २८ फेब्रुवारीच्या मध्यरात्री आपले आई-वडील, पत्नी, दोन मुले, बहिणी आणि भाचे अशा १४ जणांची निर्घृण हत्या करून स्वतः गळफास घेतला होता. या हल्ल्यातून केवळ त्याची बहीण सुबिया भारमल बचावली आहे. हस्नेलने हे हत्याकांड का केले, याबाबतची ठोस माहिती तिच्याकडून मिळेल, अशी पोलिसांना आशा होती. मात्र, बहिणीच्या जबाबातून त्याबाबतची कोणतीही माहिती हाती लागताना दिसत नाही. फोरेन्सिकचे रिपोर्ट अद्याप अले नसले, तरी विषप्रयोग झाला किंवा नाही हेच त्यातून उघड होईल. त्यामुळे हत्या पूर्वनियोजीत होती की, तत्कालीन काही कारण घडले या दोन शक्यतांपैकी एकावर प्रकाश पडू शकेल. मात्र, कारण निश्चिती होऊ शकणार नाही, असे अधिकाऱ्यांचे म्हणणे आहे. हस्नेल कर्जबाजारी झाला होता हे तपासातून पुढे येत आहे. मात्र, कर्जामुळेच त्याने कुटुंब संपविले, असा ठोस निष्कर्षही काढण्यास फारसा वाव नाही.

हस्नेलच्या बेडरूममध्ये घरात स्किझोफ्रेनिया या आजारावरील डीपाकोटी आणि स्किझोफीन ही दोन औषधे सापडली आहेत. हस्नेल मनोरुग्ण होता हे पुढील तपासात निष्पन्न झाले, तरी हत्याकांडामागचे कारण उलगडू शकेलच असे नाही. कर्मकांड, बुवाबाजी, जन्नत मिळविण्यासाठी केलेले कृत्य अशा अनेक अफवा पसरत असल्या, तरी त्याबाबतची कोणतीही ठोस माहिती मिळालेली नसल्याचे पोलिसांनी सांगितले.