क्रीडाप्रेमींनो लवकर उठा; सहाव्या दिवशी भारतीय खेळाडूंचं असं आहे वेळापत्रक

Tokyo Olympics 2020 : पुणे : टोकियो ऑलिम्पिकमध्ये आतापर्यंत भारतीय खेळाडूंची कामगिरी फारशी चांगली राहिली नाही. ऑलिम्पिक सुरू झाल्यानंतर दुसर्‍याच दिवशी मीराबाई चानूने वेटलिफ्टिंगमध्ये रौप्यपदक जिंकून दिले. त्यानंतर आतापर्यंत एकाही क्रीडा प्रकारात भारताला एकही पदक मिळवता आलेले नाही. मंगळवारी (27 जुलै) शुटींगमध्ये पदकाची सर्वाधिक अपेक्षा होती, पण मनू भाकर आणि सौरव चौधरी चांगली कामगिरी करू शकले नाहीत, त्यामुळे अंतिम फेरीत ते स्थान मिळवू शकले नाहीत. दुसरीकडे बॉक्सिंगमध्ये लवलिना बोर्गोहेनने उपांत्यपूर्व फेरीच्या सामन्यात पदक मिळवण्याची आशा निर्माण केली आहे. बुधवारी (28 जुलै) सहाव्या दिवशी भारतीय खेळाडू आणि संघाचे वेळापत्रक कसे असेल ते पाहूया.

1) हॉकी :-
महिलांच्या पूल ए मध्ये भारताचा सामना ग्रेट ब्रिटनशी होईल. भारतीय प्रमाणवेळेनुसार हा सामना सकाळी 6.30 वाजता सुरू होणार आहे.

2) बॅडमिंटन :-
पी.व्ही. सिंधू बॅडमिंटनच्या महिला एकेरीत तिचा दुसरा सामना खेळणार आहे. सकाळी 7.30 वाजता हा सामना सुरू होईल. याशिवाय पुरुष एकेरीत बी. साईप्रणीतही त्याचा दुसरा सामना खेळणार आहे. हा सामना दुपारी अडीच वाजता सुरू होणार आहे.

3) तिरंदाजी (वैयक्तिक) :-
पुरुष गटात तरुणदीप राय (सकाळी 7.31 वाजता) आणि प्रवीण जाधव (दुपारी 12.30 वाजता), तर महिला गटात दीपिका कुमारी (दुपारी 2:14 वाजता) आपले कौशल्य पणाला लावणार आहेत.

4) रोईंग :-
अर्जुन लाल आणि अरविंद सिंग पुरुष डबल स्कल्सच्या उपांत्य फेरीत उतरतील. हा सामना सकाळी 8 वाजता होणार आहे.

5) सेलिंग :-
के.सी. गणपती आणि वरुण ठक्कर पुरुषांच्या स्किफ 49 ईआरमध्ये भारताचे प्रतिनिधीत्व करतील. हा सामना सकाळी 8:35 वाजता सुरू होईल.

6) बॉक्सिंग :-
महिला बॉक्सर पूजा राणी 75 किलो वजनी गटात राउंड ऑफ 16 मध्ये खेळताना दिसेल.