पन्हाळ्याजवळ मिळणार पॅरासेलिंगचा आनंद

वन विभाग मार्चअखेर प्रस्ताव पूर्णत्वाला नेणार

कोल्हापूर

एकीकडे ऐतिहासिक पन्हाळा किल्ला आणि दुसरीकडे पश्चिमेकडे पसरलेले मसाईचे विस्तीर्ण पठार, या दोन्हींच्या पायथ्याशी असलेल्या गर्द झाडीचा जवळपास एक हजार फूट उंचीवरुन दिसणारा विहंगम नजारा विमान प्रवास न करता पॅरासेलिंगच्या माध्यमातून पाहता येणार आहे. वन विभागाच्या पुढाकाराने पन्हाळ्याजवळ असलेल्या जेऊर येथे साकारण्यात येणाऱ्या अॅडव्हेंचर स्पोर्टसच्या विविध प्रकारांमध्ये पॅरासेलिंगचा समावेश करण्यात येणार आहे. वन विभागाकडे त्याबाबतचा प्रस्ताव तयार असून मार्चअखेरपर्यंत हा प्रस्ताव पूर्णत्वाला नेण्याचा प्रयत्न आहे.

कोल्हापुरात येणाऱ्या जवळपास प्रत्येक पर्यटकाची पन्हाळा किल्ला पाहण्याची ओढ असते. छत्रपती शिवाजी महाराजांच्या थरारक इतिहासाचा साक्षीदार असलेल्या या किल्ल्यावर सुट्यांबरोबर दर शनिवार व रविवारी मोठी गर्दी होत असते. या पर्यटकांना अॅडव्हेंचर स्पोर्टसची मेजवानी देण्याचे वन विभागाने ठरवले आहे. त्यानुसार जेऊर येथे वन व्यवस्थापन समितीच्या सहकार्याने विविध प्रकारच्या स्पोर्टसचा प्रस्ताव जिल्हा नियोजन मंडळाच्या माध्यमातून मंजूर करण्यात आला आहे. जवळपास ५० लाख रुपये खर्च करुन येथे तज्ज्ञांच्या मार्गदर्शनाखाली हे स्पोर्टस साकारण्यात येणार आहेत. यामध्ये पॅरासेलिंगचा समावेश नव्याने करण्यात येणार आहे. त्यासाठीचा प्रस्ताव तयार करण्यात आला असून लवकरच त्यासाठी मंजुरी घेण्यात येणार आहे.

पॅरासेलिंगसाठीचे पॅराशूट गाडीने ओढले जात असल्याने गाडी चालवण्यासाठी जागा आवश्यक होती. तसेच तेथील जैवविविधतेला धोका पोहचू नये याचीही खबरदारी घेण्यात आली. त्यानुसार जेऊर येथे असलेल्या रिकाम्या जागेच्या ठिकाणी पॅरासेलिंग साकारण्याचे ठरवले आहे. या प्रस्तावाच्या मंजुरीनंतर तज्ज्ञांकडून वन व्यवस्थान समितीला प्रशिक्षण देण्यात येणार आहे. त्यानंतर हा प्रकल्प वन विभागाकडून समितीकडे हस्तांतरीत केला जाईल. जेऊर हे पन्हाळ्याच्या उत्तरेला असल्याने पॅरासेलिंगचे उड्डाण केल्यानंतर एक हजाराहून अधिक फुटाच्या उंचीवरुन किल्ला तसेच मसाई पठार पाहता येणार आहे.

पन्हाळा परिसरात येणाऱ्या पर्यटकांना ऐतिहासिक पर्यटनाबरोबर अॅडव्हेंचर स्पोर्टसचा थरार अनुभवता यावा, यासाठी वन विभागाने वन व्यवस्थापन समितीच्या सहाय्याने हे स्पोर्टस साकारण्याचे ठरवले आहे. त्यासाठी जिल्हा नियोजन मंडळाकडून निधी दिला जाणार आहे. येथे पॅरासेलिंगसाठीचा प्रस्ताव तयार असून मार्चअखेरपर्यंत सर्व स्पोर्टस सुरू करण्याचा प्रयत्न आहे.

- डॉ. प्रभुनाथ शुक्ला, उपवनसंरक्षक

हे साकारणार अॅडव्हेंचर स्पोर्टस्

झीप लाईन, रॉक क्लायम्बिंग, रॅपलिंग, स्लीक लाईन, स्पायडर नेट, बंजी जंक्शन