काय सांगता 82 व्या वर्षी आजीबाईंना हवी ही गोष्ट? ऐकून कुटुंबीय देखील झाले हैराण

हौसेला वय नसतं असं म्हटलं जातं. काही माणसं कितीही वयोवृद्ध झाली तरी ते आपली हौस पुर्ण करताना मागेपुढे पाहात नाही. समाज काय म्हणेल याची ते पर्वा करत नाहीत. याचीच प्रचिती देणारी एक घटना समोर आली आहे. एका ८२ वर्षांच्या आजीबाईनं एक वेगळीच इच्छा व्यक्त केली. तिला आपल्या शरीरावर टॅटू गोंदवायचा आहे. तिची ही इच्छा ऐकून कुटुंबीय देखील अचंबित झाले. ही महिला सध्या टॅटूवाली आजी म्हणून सोशल मीडियावर चर्चेत आहे.

या आजीबाईंचं नाव जूडी डे असं आहे. आयुष्याच्या उत्तरार्धात त्यांनी शरीरावर टॅटू गोंदवण्याची इच्छा व्यक्त केली. आजीची नात ब्रँडी हिने हा मजेशीर किस्सा टिक-टॉकवर शेअर केला आहे. तिची ही शेवटची इच्छा पूर्ण करण्यासाठी कुटुंबातील सर्व सदस्य तिच्यासोबत टॅटू पार्लरमध्ये गेले होते.

खरं तर जूडी यांना तरुणपणी टॅटू गोंदवण्यासाठी फार इच्छा होती. परंतु आई-वडिलांमुळे त्यांची ही इच्छा अपूर्णच राहिली. त्यांचे कुटुंबीय हे पक्के ब्रिटीश होते. शरीरावर टॅटू गोंदवणं हे असभ्यपणाचं लक्षण आहे असं ते मानत. परंतु आयुष्याच्या उत्तरार्धात आता त्यांना रोखणारं कोणी नाही. त्यामुळे आता त्यांनी टॅटू काढण्याचा निर्णय घेतला. सुरुवातीला त्यांची ही इच्छा ऐकून सर्वच जण चकित झाले. परंतु नंतर नातीने समजावताच सर्व मंडळींनी आजीला पाठिंबा दिला. दरम्यान टॅटूचं डिझाईन अद्याप निश्चित केलेलं नाही. शिवाय टॅटू शरीराच्या कुठल्या भागावर काढावा यावर देखील त्या विचार करत आहेत. लक्षवेधी बाब म्हणजे त्यांची ही इच्छा पूर्ण करण्यासाठी कुटुंबीय त्यांना मदत करत आहेत. गेले १५ दिवस वेगवेगळ्या टॅटू पार्लरमध्ये जाऊन ते युनिक अशा डिझाईनचा शोध घेत आहेत. शक्य झाल्यास कुटुंबातील सर्व सदस्य आपल्या शरीरावर तोच टॅटू काढतील असा विचार केला जात आहे.