भर गर्दीत शहामृग आला कुठून? गाड्यांसोबत स्पर्धा करणाऱ्या पक्षाला पाहून व्हाल अवाक

शहामृग हा जगातील सर्वात मोठा पक्षी म्हणून ओळखला जातो. वजनदार असल्यामुळे त्याला उडता येत नाही. परंतु प्राण्यांप्रमाणे तो वेगाने पळू शकतो. शहामृग हे सर्वसाधारणपणे प्राणी संग्रहालयातच पाहायला मिळतात. परंतु हा पक्षी भर गर्दीच्या ठिकाणी पळताना दिसला तर तुम्ही काय म्हणाल? होय असाच एक थक्क करणारा प्रकार समोर आला आहे. लोक सकाळी मोठ्या गडबडीत आपल्या ऑफिसला जात होते. त्याच वेळी शहामृग पूर्ण शक्तीनिशी रस्त्यावर पळताना दिसला. जणू त्याला देखील कुठेतरी जाण्याची घाई होती. शहामृगाचा हा व्हिडीओ पाहून तुम्ही देखील अवाक व्हाल.

हा प्रकार पाकिस्तानातील लाहोर येथे घडला. एक शहामृग सकाळी सकाळी रस्त्यावर पळताना दिसला. त्यावेळी प्रवास करणाऱ्यांनी आपल्या गाड्यांचा वेग काहीसा कमी करत तो नजारा डोळे भरून पाहून घेतला. अनेकांनी आपापले मोबाईल खिशातून बाहेर काढले आणि धावणाऱ्या शहामृगाचं चित्रिकऱण केलं. इतर वाहनांच्या जोडीनं रस्त्याने धावणारा शहामृग पाहून अनेकांना हसू आवरत नव्हतं.


वाहनांच्या गर्दीत पळणाऱ्या या शहामृगाला अपघात होण्याची शक्यता होती. परंतु वाहन चालकांनी प्रसंगावधान दाखवत त्याच्यापासून सुरक्षित अंतरावर गाड्या चालवल्या. परिणामी त्याला सुरक्षितरित्या आपल्या इच्छितस्थळी पोहोचता आलं. परंतु हा शहामृग रस्त्यावर आला कसा? असा प्रश्न सर्वांनाच पडला आहे. काही जणांच्या मते तो प्राणी संग्रहालयातून पळाला होता. तर काहींच्या मते हा शहामृग पाळीव असावा. दरम्यान या बाबत कुठलीही अधिकृत समोर आलेली नाही. मात्र हा व्हिडीओ पाहून अनेकांनी आश्चर्य व्यक्त केलं.