मुलाच्या नावामुळं बाप झाला हैराण; कुटुंबीयांना करावा लागतोय अडचणींचा सामना

आपल्या मुलांची नावं खूपच आकर्षक असावीत, असं प्रत्येकाचं स्वप्न असतं. मात्र या नादात ते काहीही नावं शोधून काढतात. ही नावं उच्चारण्यासाठी देखील त्रास होतो. एवढंच नाही तर भविष्यात या नावांचा त्रास त्यांच्या मुलांना देखील होतो. असच एक विचित्र नाव सध्या सर्वांचेच लक्ष वेधून आहे. एका व्यक्तीनं आपल्या मुलाचं नाव असं ठेवलं आहे, की जे ऐकून लोकांना धक्काच बसतो. उत्साहाच्या भरात त्यानं असं नाव ठेवलं की ज्यामुळे आता तोच हैराण झाला आहे. परिणामी या व्यक्तीला कायम आपल्या मुलाच्या जन्माचं प्रमाणपत्र घेऊन फिरावं लागतं.

इंडोनेशियामध्ये राहणाऱ्या या ३८ वर्षीय व्यक्तीचं नाव समेट वाहुदी असं आहे. तो स्टॅटिस्टिकल इन्फॉर्मेशन कम्युनिकेशन ऑफिसमध्ये काम करतो. त्याचं आपल्या कामावर प्रचंड प्रेम आहे. इतकं की त्याने आपल्या मुलाचं नाव स्वत:च्या कंपनीवरूनच ठेवलं आहे. तुम्हाला वाचून आश्चर्य वाटेल पण त्याच्या मुलाचं नाव स्टॅटिस्टिकल इन्फॉर्मेशन कम्युनिकेशन ऑफिस असंच ठेवलं आहे. लग्नाआधीच त्याने आपल्या कुटुंबीयांना याबाबत पुर्ण कल्पना दिली होती. बाळ होताच त्याचं नाव तो हेच ठेवणार आहे. त्यामुळे कोणीही त्याला विरोध केला नाही. परंतु या नावामुळे आता तो स्वत:च त्रस्त झाला आहे.

मुलाचं नाव ऐकताच लोक त्याच्यावर हसू लागतात. किंवा काही जण तर त्याच्यावर विश्वास देखील ठेवत नाही. अनेकदा तर त्याला मुलाचं जन्म दाखलाच घेऊन फिरावा लागतो. या प्रकारामुळे आता तो इतका हैराण झाला आहे. की मुलाचं नाव आता तो बदलण्याचा विचार करतोय.