मेलेले आजोबा कसे झाले जिवंत? मुखाग्नी देणार तितक्यात उघडले डोळे

डॉक्टरांनी मृत घोषित केलेले आजोबा स्मशानभूमीत जिवंत झाल्याची खळबळजनक घटना समोर आली आहे. रुढी परंपरेनुसार सर्व विधी करुन या आजोबांचं शवं स्मशानभूमीत आणलं होतं. लाकडांचे ढीग, रचलेले सरण, अंत्यसंस्कारासाठी ठेवण्यात आलेला मृतदेह असं चित्र स्मशानभूमीत होतं. दरम्यान त्यांच्या पार्थिव शरीराला अग्नि देणार, तोच आजोबा जिवंत झाले. हा प्रकार पाहून सर्वांनाच धक्का बसला.

दिल्लीमधील टिकरी खुर्द गावात ही विचित्र घटना घडली. येथील ६२ वर्षीय सतीश भारद्वाज यांचा कर्करोगामुळे मृत्यू झाला होता. गेले अनेक दिवस ते रुग्णालयात व्हेंटिलेटरवर होते. मात्र व्हेंटिलेटरवरून काढताच त्यांचा श्वास थांबला. परिणामी डॉक्टरांनी देखील त्यांना मृत घोषित केलं. त्यानंतर त्यांचं पार्थिव शरीर घरी आणून त्यावर अंत्यसंस्कार करण्यात आले. परंतु स्मशानभूमीत अग्नी देण्यापूर्वीच ते पुन्हा एकदा जिवंत झाले. निसर्गाचा हा चमत्कार पाहून सगळेच थक्क झाले आहेत.


आजोबांना मेलेलं समजून त्यांना चितेवर झोपवण्यात आलं. दरम्यान अचानक त्यांचा श्वासोश्वास पुन्हा सुरु झाला. इतकंच काय तर आजोबांनी त्यांचे डोळे सुद्धा उघडले, हे पाहून साऱ्यांनाच आश्चर्याचा धक्का बसला. रचलेल्या सरणावर ते निपचित पडले होते. त्यानंतर स्मशानभूमीतून त्वरीत त्यांना रुग्णालयात नेण्यात आलं. सध्या पोलीस या प्रकरणाची चौकशी करत आहेत.