‘ही ट्रेन आहे की बैलगाडी?’ उशीरा धावणाऱ्या मेट्रोमुळे उडाला प्रवाशांचा भडका; पाहा भन्नाट मीम्स

लोकल ट्रेनच्या तुलनेत मेट्रो अधिक वेगाने धावते. त्यामुळे बहुतांशी प्रवासी ऑफिसमध्ये वेळेत पोहोचण्यासाठी मेट्रोलाच प्राधान्य देतात. परंतु मेट्रोमुळेच तुम्हाला ऑफिसमध्ये जायला उशीर होत असेल तर?... तर तुम्ही दररोज आपल्या बॉसला काय उत्तर द्याल? हाच प्रश्न गेले ३ दिवस दिल्लीतील लोकांना पडत आहे. कारण गेले ३ दिवस तिन्ही मार्गावरील मेट्रो सातत्यानं उशीरा धावत आहे. इतकी उशीरा की आता बसनं प्रवास करणारे लोक देखील मेट्रो प्रवाशांची खिल्ली उडवत आहेत. परिणामी अखेर वैतागलेल्या प्रवाशांनी मीम्सच्या माध्यमातून मेट्रोची उलट खिल्ली उडवण्यास सुरुवात केली आहे.

गेले ३ दिवस व्हॉयलेट, ग्रीन आणि पिंक या तीन्ही मार्गावरील मेट्रो सातत्याने उशीरा पळत आहे. तांत्रिक कारणांमुळे मेट्रोच्या वेळापत्रकात काहीसा बदल करण्यात आला होता. परंतु मेट्रो सेवा आता पुन्हा एकदा सामान्य झाली आहे. DMRC नं ट्विट करून याबाबत माहिती दिली.






“मेट्रो सेवा सुरळीत झाली आहे. मात्र पुढील काही काळ मेट्रो यंत्रणा तज्ज्ञांच्या देखरेखेखाली राहील.” अशी सुचना देण्यात आली. मात्र या ट्विटमुळे आता प्रशासनालाच ट्रोल केलं जात आहे. “म्हणजे अधिकचा वेळ काढूनच घरातून निघावं लागणार की काय?” अशा आशयाचे उलट सवाल मीम्सच्या माध्यमातून प्रशासनाला केले जात आहेत.