Video: ‘मॅग्नेट मॅन’ने केली कमाल; अंगावर ८५ चमचे बॅलेन्स करून रचला विश्वविक्रम

हे जग चित्रविचित्र गोष्टींनी भरलेले आहे. अशा गोष्टी ज्यांची आपण कल्पना देखील करू शकत नाही. या गोष्टींची नोंद ‘गिनीज बुक ऑफ वर्ल्ड रेकॉर्ड’ ही संस्था करते. शिवाय पुरस्कार देऊन या टॅलेंटसाठी त्यांना प्रोत्साहित देखील करते. दरम्यान अशाच एका अजब टॅलेंटला गिनिज वर्ल्ड रेकॉर्डने सन्मानित केलं आहे. या व्यक्तीने आपल्या शरीरावर तब्बल ८५ चमचे बॅलेन्स करुन दाखवले आहेत. या व्यक्तीचा व्हिडीओ सध्या सोशल मीडियावर सर्वांचेच लक्ष वेधून घेत आहे.

या ५० वर्षीय व्यक्तीचं नाव अबूफजल साबेर मोख्तारी असं आहे. इराणमध्ये राहणाऱ्या अबूफजलने शरीरावर सर्वाधिक चमचे बॅलेंस करून दाखवण्याचा विक्रम प्रस्थापित केला. यापूर्वी हा विक्रम स्पेनच्या मार्कोझ रुईझ सेबालोजच्या नावावर होता. त्याने ६४ चमचे बॅलेन्स केले होते. परंतु त्याचा विक्रम मोडत अबूफजलने तब्बल ८५ चमचे बॅलेन्स करून दाखवले.


‘गिनीज बुक ऑफ वर्ल्ड रेकॉर्ड’ने या अनोख्या विक्रमाचा व्हिडीओ आपल्या अधिकृत इन्स्टाग्राम आकाउंटवर शेअर केला आहे. यामध्ये तुम्ही पाहू शकता की अबूफजलच्या अंगावर एक-एक चमचा ठेवला जात आहे. अन् या चमच्यांना तो आपल्या शरीरावर बॅलेंन्स करून दाखवतोय. पाहता पाहता त्याने तब्बल ८५ चमचे बॅलेन्स केले. अन् एका नव्या विक्रमाची नोंद केली. नुकत्याच दिलेल्या एका मुलाखतीत अबूफजलने या अनोख्या विक्रमावर भाष्य केलं. त्यामध्ये तो म्हणाला, की “मी माझ्या शरीरातील उर्जेला स्पर्श करू शकतो आणि त्याचा अनुभवू देखील घेऊन शकतो. माझी उर्जा मला इतर गोष्टींमध्ये हस्तांतरित करता येते. अन् त्यामुळेच अंगावर ८५ चमचे चिकटवणं मला शक्य झालं.” अनोख्या विक्रमामुळे अबूफजलला ‘मॅग्नेट मॅन’ असं म्हटलं जात आहे.