स्पायडरमॅनच खरा सुपरस्टार! कॉमिकमधील एका पानासाठी लागली तब्बल २४ कोटींची बोली

स्पायडरमॅन हा जगातील सर्वात लोकप्रिय सुपरहिरोंपैकी एक म्हणून ओळखला जातो. अलिकडेच स्पायडरमॅनचा ‘नो वे होम’ हा चित्रपट प्रदर्शित झाला होता. हा चित्रपट पाहण्यासाठी करोनाची भिती झुगारून चाहत्यांनी एकच गर्दी केली होती. भारतातच स्पायडरमॅनने पहिल्या ४ दिवसांत तब्बल १०० कोटी रुपयांची कमाई केली होती. यावरून स्पायडरमॅनच्या लोकप्रियतेचा अंदाज येतो. मात्र अजूनही ज्यांना स्पायडरमॅनच्या लोकप्रियतेबाबत शंका असेल त्यांच्यासाठी एक चकित करणारी बातमी आहे. स्पायडरमॅन कॉमिक्समधलं एक पान तब्बल २४ कोटी ४६ लाखांना विकलं गेलं आहे. आता तुम्ही म्हणाल असं होतं तरी काय या कॉमिक्समध्ये?

मार्व्हल कंपनीने १९८४ साली सिक्रेट वॉर्स क्रमांक - ८ नावाचं एक कॉमिक प्रकाशित केलं होतं. या कॉमिकमधील २५ नंबरच्या पानाचा लिलाव करण्यात आला. आश्चर्याची बाब म्हणजे या पानासाठी तब्बल ३.३६ दशलक्ष अमेरिकी डॉलर्स म्हणजेच जवळपास २४ कोटी ४६ लाखांची बोली लागली. हा लिलाव डलासमधील हेरिटेज ऑक्शन हॉलमध्ये करण्यात आला होता. पहिल्याच दिवशी ३० हजार अमेरिकी डॉलर्सची बोली लावण्यात आली होती. त्यानंतर चार दिवस हा लिलाव सुरु होता. अन् अखेर ३० लाखांच्यावर बोली पोहोचली.


असं आहे तरी काय या कॉमिकमध्ये?

या कॉमिक्सची निर्मिती माईक झॅक यांनी केली होती. या कॉमिकमध्ये पहिल्यांदाच स्पायडरमॅनने वेनमच रुप धारण केलं होतं. म्हणजे साधारणपणे लाल रंगाच्या कपड्यांमध्ये झळकणारा स्पायडरमॅन एका एलियनमुळे काळ्या रंगाचा झाला होता. या स्टोरीलाईनमुळे स्पायडरमॅन आणखी लोकप्रिय झाला होता. वेनममुळे स्पायडरमॅनच्या स्टोरीलाईनला वेगळीच दिशा प्राप्त झाली होती. त्यानंतर हे कॅरेक्टर स्पायडरमॅनमधील मुख्य खलनायक म्हणून सादर करण्यात आलं.