थंडीपासून बचाव करणाऱ्या कानटोपीवर गोंडा का लावतात? खरं कारण ऐकून व्हाल थक्क

देशभरातील वातावरण हळूहळू थंड होऊ लागलं आहे. परिणामी हिवाळी ऋतुचा प्रभाव आता फॅशन इंडस्ट्रीवर देखील दिसू लागला आहे. फॅशनच्या जगात स्वेटर, स्वेट शर्ट, कानटोप्या, असे थंडीपासून बचाव करणारे डिझायनर कपडे दिसू लागले आहेत. परंतु एक गोष्ट तुमच्या लक्षात आली का? जगातील कुठल्याही ब्रँडची कितीही महागडी कानटोपी घ्या, त्यावर तुम्हाला एक गोंडा किंवा एक लोकरीचा बॉल नक्कीच दिसेल. फॅशनच्या जगात याला पॉम-पॉम असं म्हणतात. परंतु फॅशनची परिभाषा कितीही बदलली तरी कानटोपीवरचा हा गोंडा काही गेलेला नाही. तर मग प्रश्न असा पडतो की कानटोपीवर गोंडा लावतात तरी का?

कानटोप्यांवर पॉम-पॉम लावण्याची परंपरा खूप जुनी आहे. सुमारे १०० वर्षांपूर्वी देखील टोप्यांवर आकर्षक आणि सुंदर अशी सजावट केली जात असे. `द आऊटलाइनने दिलेल्या माहितीनुसार अशा प्रकारच्या टोप्यांची निर्मिती सर्वप्रथम १९०४ साली युरोपमध्ये झाली होती. त्याकाळातील लोक विविध फुलांच्या आकाराचे गोंडे तयार करून ते टोप्यांवर लावत असत. त्यांच्या मान्यतेनुसार फ्रेयर नावाची देवता यामुळे खुश होते आणि डोक्यावर संरक्षक कवच परिधान करते. स्वीडनमध्ये सापडलेल्या एका पुतळ्यावर देखील ही बाब दिसून आली आहे. त्याकाळातील प्रशासकीय अधिकारी आणि पाद्री आपला अधिकार दर्शवण्यासाठी टोप्यांवर विविध प्रकारचे पॉम-पॉम लावत असतं. अन् १०० वर्ष जुनी ही फॅशन आजही जशीच्या तशी फॉलो केली जाते.