आयस्क्रीम चटणीत बुडवून खायचं? अनोखा पदार्थ पाहून तुमचंही डोकं चक्रावेल

इडली, डोसा, मेदू वडा हे पदार्थ आपल्या देशात खूपच आवडीनं खाल्ले जातात. हे पदार्थ झटपट तयार होतात, पौष्टिक असतात आणि खायला देखील मजेशीर असतात त्यामुळे अल्पावधीतच या दक्षिण भारतीय पदार्थांनी प्रचंड लोकप्रियता मिळवली. लोकप्रिय झाल्यामुळे या पदार्थांमध्ये आता विविध प्रकारचे प्रयोग केले जाऊ लागले आहेत. यापैकी एक प्रयोग सध्या सर्वांचेच लक्ष वेधून घेत आहे. अन् तो प्रयोग केला गेलाय इडलीवर. इडली म्हटली की पांढरी शुभ्र गोल गरगरीत आकृती आपल्या डोळ्यांसमोर येते. परंतु ही नवी इडली पाहून मात्र तुम्हाला आयस्क्रीमची आठवण येईल.


या नव्या प्रकारच्या इडलीला आयस्क्रीम इडली असं नाव देण्यात आलं आहे. या इडलीनं सध्या सोशल मीडियावर अक्षरश: धुमाकूळ घातला आहे. खरं तर या इडलीमध्ये विशेष असं काही नाही. निर्मात्याने केवळ याच्या आकृतीत बदल केलाय. इडली पारंपारिकरित्या गोल तयार केली जाते. पण एका सर्जनशिल शेफने त्याचा आकार बदलत आयस्क्रीमसारखा केला. अन् त्याचं प्रेझेंटेशन एखाद्या आयस्क्रीम सारखंच केलं. पाहाता पाहता ही नवी कल्पना खवय्याना आवडली, अन् ही नवी इटली प्रसिद्ध झाली.


हा प्रयोग बंगळुरुमधील एका हॉटेलमध्ये करण्यात आला. या हॉटेलमध्ये आपल्या दररोजच्या इडलीला आइस्क्रीम कँडीच्या आकारात सर्व्ह केले असून सोबत चटणी सांबार देण्यात आले आहे. या अनोख्या इडलीचे फोटो सोशल मीडियावर व्हायरल होत आहेत. काही तासांत शेकडो नेटकऱ्यांनी या इडलीवर आपल्या गंमतीशीर प्रतिक्रिया दिल्या आहेत. शिवाय अनेकांनी ही इडली खाण्याची इच्छा देखील व्यक्त केली.