महिलेला दररोज ऐकू यायचे विचित्र आवाज; कानांची तपासणी करताच डॉक्टरांनाही बसला धक्का

कान हा आपल्या शरीरातील अत्यंत महत्वाचा अवयव आहे. त्यामुळे कानाची विशेष निगा राखणं गरजेच ठरतं. अनेकदा आपल्या कानात खाज येते. परंतु कानात मळ असावा असा विचार करुन आपण त्याकडे दुर्लक्ष करतो. मात्र यामुळे काही वेळेस याचे गंभीर परिणाम देखील भोगावे लागतात. असाच काहीसा प्रकार या महिलेसोबत घडला. बरेच दिवस या महिलेच्या कानातून विचित्र असे आवाज येत होते. सुरुवातीला तिने याकडे दुर्लक्ष केलं. परंतु जेव्हा ती डॉक्टरकडे पोहोचली तेव्हा कानात जे दिसलं ते पाहून तुम्ही देखील हैराण व्हाल.

चीनमधील झुझोऊ या शहरात ही धक्कादायक घटना घडली. एक महिला आपल्या कानात जाणवणाऱ्या खाजेमुळे त्रस्त होती. सुरुवातीला तिला केवळ खाज येत होती. नंतर तिला काही चित्रविचित्र आवाज ऐकू येऊ लागले. अन् पुढे काही दिवसांनी कानात प्रचंड वेदना जाणवू लागल्या. कामाच्या व्यापामुळे सुरुवातीला तिने त्याकडे दुर्लक्ष केलं. परंतु एकेदिवशी ती डॉक्टरकडे गेली. प्राथमीक तपासणीत डॉक्टरांनाही काही जाणवलं नाही. त्यांनी महिलेला काही ड्रॉप्स दिले. मात्र त्यानंतरही वेदना थांबल्या नाहीत.


मेट्रो युकेने दिलेल्या वृत्तानुसार ही महिला मग पुन्हा एकदा डॉक्टरकडे गेली. यावेळी डॉक्टरांनी एन्फ्रारेड कॅमेराच्या मदतीने कानाची तपासणी केली. त्यावेळी खरं कारण समोर आलं. आश्चर्याची बाब म्हणजे कानात एक कोळी होता. तो आपलं जाळं विणत होता. त्यामुळेच महिलेला विचित्र आवाज ऐकू यायचे अन् त्रास व्हायचा. त्यानंतर डॉक्टरांनी एक खास केमिकल कानात टाकून तो कोळी बाहेर काढला. कानातील कोळी बाहेर काढल्यानंतर तिला खरा आराम मिळाला.